Pettik gustuko du bere musika beste diziplina batzuekin uztartzea. Adibidez, 2011. urtean, Xabier Leteren omenez antolatutako kontzertuetan parte hartu zuen Pettik, Alex Sardui, Eñaut Elorrieta, Mikel Urdangarin eta beste zenbait musikari, idazle eta bertsolarirekin batera. Haren harira, Sortuko dira besteak ikuskizuna sortu zen 2012n, Euskal Herriko zein nazioarteko abeslari eta taldeen kantuen moldaketak eskaintzeko. Hainbat emanaldi egin zituzten, Pettiren parte-hartzearekin.

2016an, berriz, Irati Jimenez idazlearen Nora ez dakizun hori (euskaraz) eta Nora (gazteleraz) narrazio liburuak oinarri hartuta, literatura, antzezpena eta musika uztartzen duten saioak eskaini dituzte Jimenezek eta Pettik elkarrekin.

2016aren amaieran, Itzal zaunka disko-liburuan parte hartu du. Ipuin grafiko batek eta hamaika kantuk osatzen dute argitalpen hori, Antton Olariagaren marrazkiek, Harkaitz Canoren hitzek eta Jexuxmai Lopetegiren musikaz josia. Txakur baten hausnarketek izatearen oinarrizko zalantza eta galderetara eramaten dute irakurlea eta entzulea. "Zakur ilun, begi urrekara" abesten du Pettik diskoan, eta zuzeneko emanaldian ere aurkeztu du.

2017ko Literaturia jaialdian, berriro elkartu da Irati Jimenezekin. Hain zuzen, Literaturiaren irekierarako berariaz prestatutako emanaldi bat eskaini dute elkarrekin: Nigan, ispilu batean bezala. 

2020an, berriz ere poesiaren osagarri izan dira Pettiren gitarra eta ahotsa, Mikel Sotoren Suak pizten direnean  liburua aurkezteko errezitaldietan.

Eta 2021ean Frankenstein agurgarria aurkeztu du Ana Galarragarekin batera. Emanaldian kezka zientifiko, etiko, feminista eta literarioak txirikordatzen dira, Pettiren musikak girotuta. Estreinaldia (H)ilbeltza jaialdiaren barruan izan zen.